بالعامية ......... نفد الرصيد ...دكتور مدحت
بالعامية ......... نفد الرصيد .
*******************************
الظلم ليل فارد ستايره السود علي عيون النهار
مالي القلوب شره بدال الدم نار
جمره مسافر في العروق
زارع ملايين الحروق
ومخللي احلام الصغار اطلال متاحف للدمار
وانا قلبي م الظلم انكسر
ولا حد داري م البشر
والقلب لو يوم انكسر م الظلم عمره مينجبر
بس الخطر كل الخطر ولا حد حاسس بالخطر
الشمس تاهت ف السما بين الغيوم
والليل جنون وظنون وبوم
والهم حافر الف قبر للقمر
الهم جوايا سكن
والقهر عاملني وطن
والقلب من كدب الصور ضج ورطن
الكدب واضح للعيان
مع انه له مليون لسان
وف كل مرة لون وطلة وصولجان
ف عيونه اوهام الشجن
طافح علي وشه عفن
ريحته مسافره ف الزمان ترسم علي جبين النفاق وشم الهوان
الوشم فكرة هايمة جوه ف الشعور
ومرايته غيطان البدن كل البدن
وانا عمري معرفت الذواق
بين الاحبة والرفاق
انا قلبي كان بستان حنان
ولا عمره خان ولا عمره هان
وبرغم كل الامنيات و التضحيات
وسنين من العمر اللي فات
دايما مطالب بالتمن
لاكن خلاص نفد الرصيد
ولا عاد يفيد خنق الاهات
ولا الصراخ ولا السكات
ومفيش خلاص الا الزمن ومفيش خلاص الا الزمن
دكتور/ مدحت
تعليقات
إرسال تعليق